الأرض تشكي ضيمها من ظماها

يا الله بنوٍ مدلهمٍ سحابه
يسقي (ثرى ارضٍ بعد القيض ماها)
يا الله يالمطلوب منك الاجابه
تغيثنا وتزيل عنها غثاها
طالت علينا والليالي تشابه
واصبح هواها ما يناسب هواها
النفس ملت من حياة الكأبه
والارض تشكي ضيمها من ظماها
والعود مات ولا بقى الا ترابه
جفت عروق اشجارها مع نماها
تصحرت واظن ما به غرابه
حتى الطبيعه غيّرت محتواها
تجردت من ثوبها والكتابه
ضاعت ارسوم حروفها من سناها
عقب الخضار اللي يسرك جنابه
تكشفت ثم طار عنها غطاها
يالله سترك يا معز الصحابه
الكل منا في ذنوبه تباها
والحسد بين الناس يكثر نصابه
والا الزكاه اللي بعضهم نساها
وحل الجفاء والبغض بين القرابه
ما عاد تعرف طيبها من رداها
والوصل كف وحاربوا من سعى به
عليه حمل من الملامه كلاها
هم ما اعرفوا في غيبها ويش مابه
تمدي و لا يمدي عليهم مداها
زاد الرصيد ولا حسبنا حسابه
يا كثر زلات البشر مع خطاها
عطفك ولطفك يا الهي ولا به
غيرك ينجينا من اللي بلاها
يالله يالمطلوب منك الاجابه
تغيثنا وتزيل عنها غثاها
عبدلله الهقاش ..