سفر دون رجعه

مع السلامه يالقا حبنا اليوم
غادرت عن حبك سفر دون رجعه
في رحلة الفرقا ترى الأمر محسوم
هذا سفر فرقا على غير جمعه
عن حبك اسافر ولاني بمليوم
دامه لغز ماله من الحل رمعه
تعبت أعيش بدنيتك تقل منجوم
والعمر قفى ما تذوّقت نفعه
عايش على ذكرى مضت كنها احلوم
بألفين وسبعه يوم عشرين سبعه
يوم الغلا من بيننا البين مقسوم
متقاسمينه بين ثلثه وربعه
وهالحين دام المسأله صد وهموم
حب المذله صدّر القلب منعه
أنا مسير بس ماني بمحكوم
وش عاد لو تطفين بالدمع شمعه
أنا إن هجرت الحب فالقصد مفهوم
الحر في نفسه عن الذل رفعه
ابقى الغريب اللي من الحب محروم
وتبقين شوق المغترب يم ربعه
وابقى بدونك حاكما طاح مهزوم
وتبقين مثل الجوهرة دون لمعه
برحل! مدام اللي حصل شي مقسوم
وحلفت ماتذرف لفرقاك دمعه
دامك لغيري حسب عادات وسلوم
الله ولا حبا لتشويه سمعه
مع السلامه آخر ايامنا اليوم
علم ٍ اكيد انه سفر دون رجعه
محمد حلوان الشراري