صوت الصورة

فكره طرت له واختصرها بسرعه
عنده مكيف والحراره شديده
سوى موزع يا هل الجود فزعه
ثم أهتنا بالنوم ساعه جديده
حمد عبدالله الوايلي - حوطة سدير
ياللي على مكيفك مشبوك بنطالك
تفسير فعلك عرفنا ويش تعريفه
لجل الهوا تقسمه في غرفة عيالك
أو إن عقب الغسل محتاج تجفيفه
سعود سعد العتيبي - الرياض
في ما اعتقد إن السكن بيت عزاب
والبيت حوسه من حديد وسريره
ولو له رجولٍ قلت ذا قاشعٍ باب
صحراوي يربط مسامير سيره
سعود بن عبدالعزيز الهزاع - نعام
هذا الموزع يا جماعه بلاشي
يعطي هوا يا ناس للغرفتيني
وهذا مؤقت لين يطلع معاشي
ياما به التوفير يالطيبيني
محمد بن عبد العزيز الخنيفر - أشيقر
يا صاحب الورشة ترى السوق خلاك
سروال دقاقي كفى عن حديدك
زبونك الأول لقا حل ببلاك
وفّر دراهم واغتنى عن وعيدك
عبدالكريم النغيمشي
توزيع تيّار الهواء فكروا فيه
حتى غدا بقماش حاجه غريبه !
لا دكت لا قسّام ما عاد يبغيه
في غرفتين الجو ما اجمله يا اطيبه
بالبنطلون الحر مبعد وناسيه
راع الحوايج لو بغى الشي بيجيبه
عبدالكريم بن خزيّم - البكيرية
أفضل طريقة لا طفى الكهرب اليوم
تدخل مكيف خص لا صرت حرّان
برّد على جسمك ويحلا لك النوم
ما يحتمل قيضٍ وتيار عطلان
عبد المحسن بن محمد المحيسن - رياض الخبراء
صحراوي مكيف وحالته حاله
حالة عزوبي عايشٍ في غرابيل
يا عزتي له الفقر رأس ماله
تلخبط أوضاعه نهاره مع الليل
عبدالله بن عبود السهلي - تبوك
الجو حار وحاجتي للبرادي
مكيف واحد ما هو يفيدي
وهذي طريقة يالربع واقتصادي
وأيام ثم أيام وأشري جديدي
ريان بن محمد الخنيفر - الرياض
تجلت البساطه بهذه الصوره
شقةٍ ومكيفاتٍ صحراوي
وسروال طاير واضحٍ ضهوره
من هوا المكيف البرّاوي
سعود عائش التميمي - جدة
فكره غريبه والحراره شديده
أكيد توزيع الهوا صار بالدار
وليت المكيف لا توقف تزيده
حيث الحراره كايده ما به اعذار
بشائر القحطاني - الرياض
صورة العدد - تصوير غزية الفويهي
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070 01
ونرحب بما تلتقطه عدساتكم
من الصور النادرة والطريفة