وإذا حضرت بمجلسٍ به جداله

واذا حضرت بمجلسٍ به جداله
وطال الحديث وحل تفكيك الاقفال
اصحى طويل الصوت لا جا مجاله
يخدعك باقواله وتصدم بالافعال
يلزمك تطلب عن سجله رساله
وتعرف فيها عن سلوكه والاحوال
واذا تضّحك ما خفا من خلاله
كيل التعامل قدر وزنه بمكيال
وكم واحدٍ يطغى الشره في مقاله
واذا سمعته قلت ذا قول رجال
واذا الزمت واستورطت به حباله
عودٍ ذليل ناكسٍ دون الاقوال
يبغي يسجّل ما قفٍ من هباله
ما يدري ان تفعيل قوله له اقبال
وما يكتفي في مدح ابوه وخواله
لا نال مجدْ ولا سلْم هم وهبال
المرجله مرقى صعيبٍ مناله
ماهيب في عد المآثر والاجيال
ولا كل من يطلب ذرى المجد ناله
الا الذي يوثر على النفس والحال
وكلٍ تعرف الناس طبعه وحاله
وتلّبسه ثوبٍ على القد تفصال
وياك لا تسمع قليل الجماله
اللي ستر حقده بثوبٍ وسربال
يطمح لحمد ولا سعى في وصاله
يريد شكر ولا فعل ربع مثقال
أكذب كذوب وحب نفسه بداله
ولا له بهم الغير همٍ ومدخال
فعله خبيثٍ لو يزخرف مقاله
خله وطبعه عنك يا طيّب الفال
يظن محدٍ عارفٍ ما بداله
«والناس تدري عن جديده والاسمال»