بيت القصيد

ياملهمة فكري بترتيب الاشعار
منك استمد أجمل بيوت القصيدة
مادمت هايم فيك مانيب محتار
اليا نويت اطلع بفكرة جديدة
عندك بساتين المعاني وانا اختار
والشارد ابحث عنه عندك واصيده
الله يفكك من صواديف الاقدار
وانتي فرح قلبي .. وشوقه .. وعيده
ما اهتم الى من صار في قلبك اسرار
فن القرايه في نواعسك اجيده
اقرى علومك كلها سر واجهار
وادري بك من اسنين مهره عنيده
انتي هواي .. وفيك ما اطيع الاشوار
واشتاق لك يااللي قريبه بعيده
في قربك الجنه .. وفي بعدك النار
ودرس المحبه من غلاك استفيده
واعطيك عشق بدون حدٍٍ ومعيار
وازيد في قلبي لعينك رصيده
وابيات شعري لجلك اطوال واقصار
اشوفهن بالزين بيت القصيده