صوت الصورة

إن كان مالك من يدينك عويني
ما تنفعك إيدين غيرك من الناس
الشاحنه شايف كفرها متيني
يحتاج تبديله مراسٍ وشدة باس
إعل بمقدورك وربك يعيني
ترى الكفر حاله ليا قِدم حسّاس
سعود عائش الحربي - القاهرة
يا موتري شديت فوقك وبنشرت
وانا عليّ اغير الجنط عنك
العالم الله عنك ما يوم قصرت
الزيت في بطنك والدراهم فدنك
إبراهيم بن ثواب الشبيشيري
المور بنشر وحنّا صيف
ياليتني من هو يساعدني
يا ليتني قد وصلت طريف
مع فجّت الضّو قومني
عبدالكريم عبدالرحمن السلوم - القرائن
يا مال فرقا العين شوف
بنشر تسويه المره
تحدها غصب الظروف
على هلاك ومخطره
عبدالله بن عبود السهلي - تبوك
اللبس ساري والمواقف عسيره
زوله تسوق المور والمشي قدام
وعطل عليها في طريق المسيره
وترجلت ماهمها صورة إعلام
تكفون ياللي تعرفون السريره
شوفو لها لوبد على الحال الزام
حمد عبدالله الوايلي - حوطة سدير
يا بنت يكفيك هالصوره
ترى الكفر ما به خلافي
روحي لمطبخك مشكوره
وسوّي قهاويك والكافي
ريان بن محمد الخنيفر - الرياض
الجسم ناحل والكفر صعب فكه
والمور واقف بالخطوط الطويله
بنشرت بين المدينه ومكه
يالله تجيب اللوبد الي يشيله
عبدالمحسن بن محمد المحيسن - رياض الخبراء
مادام ربعي عن مداويركن عجز
شوم الحريم يعادل أقوى الرجاجيل
حنا لها ونفز في فكها فز
ولنا الدروب النايفات المداهيل
سالم معزي الفهيقي - تيماء
تربط صواميل الكفر خوف تنحل
ثم يتورط بالحمول الثقيله
شغلٍ كليف ولا تضجر ولا تمل
الرزق والمحصول منذا التريله
سعود بن عبدالعزيز الهزاع - نعام
يا بنت وينك ووين السقس
صيحي لغيرك يفكونه
فك الصاموله ترى بالعكس
ما تحرزة كل مزيونه
جميل بن محمد العنزي
كفرته أكبر منك ذا الموتر مصيبه
كل عام الزفت منه يغيرونه
كل ما جا خط قلت الله يجيبه
ولا خذينا عام ليهم بحفرونه
غنام مسعود القريني
الرجل واقف والعضود أخذلنّه
وما هو بقادر ينجز اللي يسويه
يحتاج له فزعه على فك سنّه
ويبدل كفره اللي من العام شاريه
عوض لافي الرشيدي - حفر الباطن
عجوز ياللي حطت الحد
تحزّمت وفسرت عن ذرعانها
فكت صواميل الكفر بقوة اليد
يوم السواق استبنته ما شالها
خالد بن ناصر المخيمر - روضة سدير
لا تعذب حالك وعندك ورش
الكفر ما هو خفيف البنشره
كفيلك عندك وتظرب فرش
البطاطس ما له إلا المبشره
محمد بن فهد الجلعود - سميراء
صورة العدد تصوير ياسر الصيخان
نستقبل مشاركاتكم
على إيميل الخزامى :
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم