اختصار السالفة

ياليتني لا ابعدت عن عينك انساك
وليت الجفا غصن يديني تطوله
ما كان حدتني الليالي لذكراك
ولا كان ليل الهم عشته بطوله
هذا اختصار السالفه لا عدمناك
يعني ترى ضاقت بقلبي حلوله
هذي ثلاث سنين مرت بلياك
وباقي ثلاث شهور ويتم حوله
وعجزت لانسى لو تناسيت لاماك
ومثلك ترى ما ينسى بالسهوله
يا صاحبي يا غلى المخاليق لولاك
ما اسرج محمد لجل عينك خيوله
ولا كتبت احلى القصايد لعيناك
لين ازهرت منها الفيافي المحوله
قصايد مثل الذهب يوم تزهاك
تغار منها كل عذراء خجوله
واليوم شوفيني وانا مبعد هناك
ولا عاد باقي شي عندي بقوله
الا بقى حاجه ترى مقدر أنساك
وقلبي.. ترى نوخ لحبك ذلوله
محمد بن عبدالرحمن بن خميس