*ماهو تفسيرك يامعوكس لتأجيل مباراة الرائد والاتفاق وضياع الجوال ورمي الاتفاق للمسؤولية على لجنة المسابقات؟ عبدالله التميمي- الرياض - أجل لو ضاع الآيباد كان توقف الدوري! * الحبيب معوكس كيف اداري يستقيل ويقول اذا تأهلتوا للبطولة الفلانية رايح ارجع لكم؟ محمد العويرضي- الجوف - يعني رجعوني بس بطريقة وين اذنك؟. * الناقد معوكس وش رأيك بالحكم الالماني الذي قاد مباراة الهلال والنصر الاخيرة ظنك درس القانون والا مش حالك؟ حمود الحربي- الدمام - قانون لامنشاف ولامن دري! * عقبال ماتصير حكم يابو العواكيس ونشوف الاداريين يمسحون بك البلاط عشان تتوب عن حش الناس؟ بدر المحيسن- ابها - ماني بصاير مثل الحكم الألماني اللي جاب العيد أجل الكورة برا ويقول مشي! * الاخ ابو العواكيس الا تتفق معي انه في اللجان من الممكن ان يصير اي شيء وغير متوقع، وأسهل شيء عندها الاعذار؟ خالد الرزام - نجران - هذي لجان كل من ايده اله * السيد معوكس ماهي حكمتك المفضلة ونرجو ان نشوف لنا اختراع ما عاد يصير فيه تأجيل مباريات؟ فهد الدوسري - الافلاج - حكمتي المفضلة كل واحد يأخذ باله من جواله! * الصديق الوفي معوكس الم يسعفك حدسك ويجعلك تحدد بطل الدوري من بدري؟ يوسف القثامي- جدة - البطل مواريه واضحة بس يا خوفي من العوامل الخارجية! * الاستاذ معوكس اين قضيت اجازة الربيع، صحيح في ماليزيا؟ نواف الشامي- عرعر - الا ماليزيا يقولون تضيع فيها الجوالات * العزيز معوكس اصعب قرار مر عليك ولم تهضمه.. ماهو؟ سعيد القحطاني - خميس مشيط - قرار ترشيح الأبطال من المكاتب! * المغرد معوكس: ما رأيك بمحللي القنوات الرياضية الذين يصبون جام غضبهم على الحكم المحلي، بينما الحكم المستورد تقع منه أخطاء والجميع (سكتم بكم) و(ديربي العاصمة) شهد أخطاء تحكيمية بدائية ولكن لم تحدث ضجة من محللينا الأكارم؟ وما رأيك بالحضور الجماهيري حيث أنني تواجدت وكان جمهور الهلال 80 بالمائة من المدرجات تستحوذ عليها؟ عبدالله المطيري - الكويت -المحللون مثل السيل سهامهم نحو فريق واحد فقط أما جمهور الهلال جمهور فوز بس!. *صديقي الدائم معوكس مارأيك بأجانب الهلال هذا الموسم؟ صديقك – حمد الدوسري ابو مبارك- العزيزية- الرياض - العربي وهرماش ليت أحد يقولهم أن فريق مغربي يبيهم أما الكوري يبي له وزنية خاصة أما السويدي فبدأ يدحدر! * انصحك يامعوكس ان تربط جوالك في جيبك بسلسلة عشان مايضيع وماترد على المعجبين؟ صالح الدهمان- تبوك - بس أخاف يضيع مع السلسلة
