اللغز

الأسبوع الماضي كان لغز الأسبوع من طرح الشاعر عبدالله الصالح الأطرش من الرس والذي يقول:
يا ويش رجال ظهر بين شخصين
واللي مضى مفقود والناس هجاع
ان زان يجمعهم ولو هم بعيدين
وإن شان تلقاهم محاذيف مقلاع
وكان حلول الشعراء:
لغزك يا بو صالح يخوف كثيرين
خص الذي من ثاني العرس يرتاع
فحص الزواج اللي سبق عقد زوجين
نتايجه تطمين تأمين وامتاع
فهد بن عقيل الطويان - بريدة
يا مرحبا باللي بنى لغزه الزين
حاز المعاني كلها فن وإبداع
لغزك يا الأطرش واضح للفهيمين
فحص الزواج اليوم لازم وينطاع
عبدالمحسن بن محمد المحيسن - رياض الخبراء
يا مرحبا بك عد رمل البساتين
يالاطرش اللي بالمهمات فزاع
تحليل حل اللغز ما بين زوجين
عساه ينجح دوم وتزين الاوضاع
فارس مشعل العريني - البداع
عبدالله الأطرش تحيه ملايين
ياللي مع الالغاز معروف لك باع
واللغز حله فحص ما بين زوجين
راي سديد بالبلد نفّذ وشاع
علي رشيد الرشيد - رياض الخبراء
العلم نور وزاده اللغز نورين
لغزك يا بو صالح رمعته ولا ضاع
الفحص قبل العرس زين علي زين
هذا جواب اللغز لا تقول مرماع
عبدالله عبدالرحمن العجلان - البكيرية
حلل قبل تعرس وتنجب وراعين
واللي رسم هالدرب تراه ما ضاع
ترى الحذر واجب منول وهالحين
قبل تلوم النفس وتزيد الاوجاع
راكان عبدالرحمن العريني - البدائع
الحل تحليل يجي بين شخصين
يا مرحبا مليون يا زين الاضياع
يا صلك حل اللغز والناس نيمين
ساعة تريث اللغز والناس هجاع
محمد أبو دحيم - البدائع
لغز الأسبوع
كتبه للصفحة الشاعر أحمد بن ناصر المحرج من الرياض ويقول:
ياويش بنت يا جماعه قديمه
يهابها من كان لو هو شجاعي
في قربنا دايم تراها مقيمه
باسباها كم واحد في ضياعي
روحه وجيه لامشت مستقيمه
وليا مشت عينك جهتها تراعي
* نستقبل الحلول على الفاكس 4871070 أو الايميل rb-khozama@alriyadh.com ونرحب بطرح الألغاز