اللغز

الأسبوع الماضي كان لغز الأسبوع من طرح الشاعر محمد صالح الأطرش من رياض الخبراء والذي يقول:
أنشدك عن ورع تسمى بمخلوق
وهو بالحقيقة من جماد صناعي
به ميزة تطمن له الروس من فوق
قايد مع اخوانه بمشي جماعي
وقد وصل للقسم العديد من الحلول ولكن لم يوفق للحل الا العدد القليل منهم:
الورع بالساعة وممشاه برفوق
سموه عقرب والحقيقة صناعي
هذا جوابه جارك الله من العوق
واقبل سلامي والتحية وداعي
محمد أبو دحيم - البدائع
يا محمد الاطرش تكلمت بوثوق
بالشعر لك صولة وجولة وباعي
الحل عقرب للدقايق يجي فوق
هو اسرع اخوانه يحث المساعي
علي رشيد الرشيد - رياض الخبراء
لو من سبق بالطيب ما هوب ملحوق
والطيب بالاطرش مع الناس شاعي
والورع عن اسمه بالأفعال مفروق
هو عقرب الساعة مع الوقت ساعي
فهد بن عقيل الطويان - بريدة
جبنا الجواب اللي من الفكر موثوق
والف التحايا لباذلين المساعي
ذا عقرب الساعه لاجاكم العوق
لامن تعطل راعي الوقت ضاعي
محمد بن عبدالعزيز الخنيفر - أشيقر
سلام وحل اللغز سقناه لك سوق
أبرمت به الفكر وأذعن وطاعي
ذا عقرب الساعة ما هوب مطفوق
يمشي على نظام وقته يراعي
عبدالله عبدالرحمن عمر اللاحم - الشماسية
لغزك يالاطرش جارك الله من العوق
انا رمعته جاهز(ن) باندفاعي
هو عقرب الساعة على الوقت ما يبوق
الوقت غالي ينشرى ما يباعي
سعود محمد بن سياف البيضاني - الرياض
يا مرحبا والحل بالحال ما يعوق
لقيت حله يا كريم المساعي
في ساعتي عقرب وفي ساعتي ذوق
رنه اليا من رن رنه سماعي
صلاح بن عبدالله اليابس - رحيمة
لغز الأسبوع
كتبه للصفحة الشاعر أحمد بن ناصر المحرج من الرياض ويقول:
يا ناس خلوني ترى الراس محتاس
شوفه غريبه شفتها وازعجتني
ورع وشفته ناحل الجسم له راس
ولا له عيون وشوفته حيرتني
ويشابهه بنت لها جسم حساس
بعين وحده دون راس اشغلتني
* نستقبل الحلول على الفاكس (4871070) أو الايميل
rb_khozama@alriyadh.com