غصن السنين

ماتوفيك المشاعر والحنان
وش تبين أكثر.. دخيلك وش تبين
كنت أجي واحسب مسافات المكان
ارحمي شوقي... وخطوات الانين
خطوتي تثمر زهور وزعفران
في ثرى وصلك.. على غصن السنين
تكسريني/تجبريني/في ثوان
تكتبيني/تشطبيني/ تلعبين
صادق الاحساس في جفني يبان
يستبيحك عذر.. في رمش حزين
كم تعب يكتب من اوصافك بيان
مابقى من حبره الا دمعتين
وكم سهر يرسم على اوهام البنان
وتذبل الصورة بوسط الحاجبين
من خناجر عينك ارخيت العنان
احسبيني ضمن طعنات الحنين
وانثري شعرك... على وجه الزمان
وارسميني في عيونك والجبين
موجك اللي ماعطى قلبي الامان
مايرسيني على شط اليقين
ان غرقنا.. مارضينا بالهوان
وان حيينا.. ماتغيرنا السنين
وليد العبدالله