علام قلبي كل ماقلت ابنساه

علام قلبي كل ماقلت ابنساه
ارجف ولاكن الضلوع اقضبنه
يصفق كما حرن تهيض لمجناه
يصفق بجنحانه ولا يبعدنه
مسباق رجله قاضبه في معاناه
اليابغى يكفخ بهن طمننه
مالي جدى الا كلمتين اه ويلاه
ودموع عينن من غلاته بكنه
العام لامنا بغيناه شفناه
واليوم مدري وين عني حدنه
سود الليال ولابقى غير ذكراه
حتى عيوني من غلاه افقدنه
اذكر ليا مريت سلم بيمناه
واليوم ماكنه وقف قدمهنه
بيبان بيتن ليتنا ماوطيناه
ولاشفت ماهاض الفؤاد وشعنه
شعية قطيعن ساقها ثم تمساه
الليل موحش والسباع اقتفنه
لانافعن صوته ولا ضرب شلفاه
اربع عشر ذيبن عون وكنفنه
هذا انا يالايمي عقب فرقاه
عقب الليالي عن نحايه نحنه
وختامها يارابحن من ترجاه
اترد شارح خاطري ضحك سنه
مذكر الروقي – الطائف