أبو جديلٍ على الأمتان نزالي

يا مل قلبٍ كثير الهم يجتالي
إلى اسفهل وتطامن هاضت اشطونه
ماتت عروق الحشا من عقب همّالي
من عقب ما هو ربيعٍ يبْسَت أغصونه
عزاه يا أهل الهوى لو حال وحتالي
راع الهوى ماله علاجٍ يداوونه
حسبي على اللي جبينه كنّه أهلالي
ما يرحم اللي عليه الكبد مطعونه
من شدّ وابعد وهو ما غاب عن بالي
ما غير أنشّد عن الأخبار وش لونه
أبو جديلٍ على الأمتان نزالي
والهرجه اللي عليها الملح مازونه
في كل يومٍ سخيف العود يحلالي
زينٍ بعيني ولا أبغى من يحَلّونه
يلعب بقلبي هواها يوم تبدالي
قلبي معه دخّله في وسط مكنونه
أنا أشهد أني سقيم وباريٍ حالي
حبّه لجى بالضمير وشيّد أركونه
يا عنز ريمٍ تروتع فالخلا الخالي
في وسَطْ روضٍ بعيدٍ ما يدلونه
إن جيت أبنساه تالي الليل يطرالي
مدري ورى النفس تالي فيه مفتونه
والقلب عيّا يدوّر فيه الأبدالي
من راح عنّي كرهت الحب وفنونه
عبدالعزيز بن محمد بن قاسم العنقري