الرواية

وش عاد باقي ياهناي ومنايه
ياغايبه مااظن باقي ولاشي
شوفي جروح القلب زادت شقايه
وزاد الظلام بدنيتي وانطفا الضي
صوب الامل بالشوق سارت خطايه
وصوب الشقا سرّا الامل خطوته بي
ياروح روحي يامناي وهوايه
يا الطف من النسمات.. واعذب من المي
ان كان جيتيني فانا مبتغايه
حبٍ على وضح النقا صافيٍ لي
قربك بليّا شك يروي ظمايه
ويروي ظما قلبٍ شرايينه اظمي
شمس المحبه شعشعت في سمايه
عن حر قيظ الحزن انتِ لي الفي
يروي ظلام الليل عنك الروايه
وانا على طاري اللقا منطوي طي
كن النجوم الساطعه في سمايه
ترسم مراسم مسكت ايديك بايدي
اتخيّلك يانور عيني معايه
واليا تخيّلتك تناسيت مافيّ
رميت كل هموم قلبي ورايه
واقبلت لك قلبٍ من الحب مبليّ
سبحان من خلّاك بالحسن آيه
وحفظ جمالك من هل الغدر والغي
باعيش كل العمر وانتِ رجايه
وغيرك فلا والله يطري وانا حي
وان قيل نار الحب تكوي حشايه
النار تحرق وآخر الطب بالكي
عادل بن سليمان المخلفي - الرياض