الحمد لله يوم طليت.. بحضور

سلام يا وجهٍ به الخير منثور
وجهٍ يشع بنور الإسلام والدين
وجه المليك اللي به الحب والنور
نور الشريعه مع بشاشة سلاطين
يا سيدي من طالع الوجه مسرور
ومن صافحك يلقى بك العطف واللين
ويشوف في عينك مسافات وزهور
ويدري بقلبك روض حب وبساتين
ولك من وطنك الحب ظاهر ومنشور
على امتداده في قلوب الملايين
شف الفرح ترعد به قلوب وصدور
ويهل هتانه من العين والعين
كن البلد بالوسم غايم وممطور
والأرض فزَت بين فل ورياحين
والحمد لله يوم طليت . بحضور
وشفناك طيَب يا كثير المحبين
والباس خف وجيت شعبك على الفور
من حبك اللي ما يبي له براهين
ودام الوطن بالدَين والعدل مشهور
ما هو تحت من يكتبون القوانين
وما دام هالقران للحكم دستور
فحنا بخير ونورنا صار نورين
حقه علينا نصبح الباب والسور
ونحميه ونرفع رايته بالميادين
والله يأمنا بالأوطان والدور
قولوا معي آمين وآمين وآمين