ريم البوادي

قايد الريم جار وما حكم بالعدل
ليه يطعن خفوقي بعد ماخذ ودادي
هو غلبني وأنا اللي ما غلبني الرجال
صرت مثل الغرير انصاه في كل وادي
جادل فاق وصفه كل وصف الجمال
وزينه اللي عطاه الله ما هو بعادي
كمله خالقه وأهله ربوه بدلال
دللوا الغرو لأنه مثل ريم البوادي
لو غلا مترف الكفين روح وزال
كان عيني غفت ما طاب فيها السهادي
لكن الصبر طول والوصال استحال
والبلا والوقت ما حقق مناي ومرادي
ولا التوجد يفيد ولا يفيد القتال
ولا يرده بكاي ولا يهزه عنادي
ليه ترف القدم بعد المواثيق مال
ولا متى اطرد ورآه ولا متى اهجر بلادي
والله أني سقيته من عيوني زلال
وكنت أمسي بجوعي لاني أعطيه زادي
لكن اليوم راح وحل بأرض الشمال
وما ذكرني وأنا اللي طول الأيام أنادي