لا تقولين

قد ما تعرفين تجاملي جامليني
لا تجيبين لي موتي ولابي زياده
يكفي الشوق واللي من بعادك يجيني
اه ياللي سكنتيني بلا أيا إراده
اقتحمتي فؤادي وانتزعتي وتيني
ما عزمتك على قلبي ولا هي بعاده
ينفتح قلبي الموصد أو انه يليني
لكن الله خبيرٍ في مصالح عباده
حطِك بداخلي واسرج لحبك حنيني
أسكنك قلب مكتوبه عليه الإباده
وعن هوى الغيد ربك سدلي شوف عيني
وأنتي اللي غفيتي فوق هاك الوساده
والتحفتي خفوقي طول برد السنين
وبعد ماذاق جفنك راحته في رقاده
جيتي انتي تقولين الهوى ما يبيني
ليه ياللي على شانك خذيت السياده
لا تحطين كيد الخلق بينك وبيني
واجب إنك تعرفين السعد والنّكاده
وانظري لي بعين الحق لا تظلميني
لا تحكمين قلبِك مخطيّن فاعتقاده
أشهد إنك جهلتيني ولا تعرفيني
أيه ياطفلة أشواقي بهون وركاده
إخذي انسب قرار إليا أتُخِذ ترحميني
وإلا شوفي عذر ثاني بغير السعاده
لا تجيبين طاريها ولا تظلميني
عبدالرحمن الحميدي