نبض القلب

أهلين يالوجه الصبوح اللي ملا كل الجهات
واستبشرت في طلته روحي وعافت ضيقها
يانبض قلبُ يعشقك ياجامع كل الصفات
يا اللحظة اللي طول عمري انتظر تحقيقها
يا فرحتي يا منيتي يا اجمل تباشير وسمات
يادرةُ كل الحلا مصبوب في تنسيقها
تعال عيش بخافقي عوضني أيام الشتات
وارسم ملامح فرحتك وأقدم على توثيقها
تعال نقضي وقتنا نشوه وتحقيق أمنيات
وكل المساعي اللي تودي للفراق نعيقها
نكتب مشاعر نبضنا اثنين في هذي الحياة
روح المحبة بينهم يطرب نغم تشويقها
ونعانق أطياف الهوى على طريقة خذ وهات
نسقي غصون أشواقنا ونزيد في توريقها
يا زين نفحات الغلا ساعة تجي من طيب ذات
ويا زين لمسات الغرام العذب في تطبيقها
بين اليدين الحالمة بين القلوب المرهفات
اللي جسور الحب نظرتها على تعتيقها
ياصاحبي كلي انا فدا العيون الناعسات
اللي استلذ بطهرها واحرص على تصديقها
من وين ما ارحل بالنظر القاك في كل الجهات
يعني بدونك دنيتي ماطيقها ماطيقها