الشعر

الشعر ماهو بالمصارخ والمهايط والصّياح
ولا هو بقولة أنا وانا وانا وانا !!
الشعر هو أرقى الكلام الصادق العذب المباح
اللي يجود به الشعور بلا تكلّف أو عنا
الشعر ديوان العرب وسلاح من لاله سلاح
ولسان حال الأمه اللي مالها عنّه غنا
الشعر مالمس المشاعر والمسامع بارتياح
ماهو كلامٍ هنا يدخل ويطلع من هنا
الشعر مجموعة مشاعر تجمع افراح وجراح
قيفان واوزان وبحور وفكره وسبك وبنا
الشعر طيرٍ فالوجود يحلّق بليا جناح
ماله علاقه في شكل او لون أو فقر وغنا
تقدر تقول انّه هو السّر الوحيد المستباح
من شاعره لي سامعه يظهر ولوانّه كنا
والشعر لفنون الكلام ولاحرفه تاج ووشاح
أو باختصار الشعر لحروف الهجا نور وسنا
وهبه من الله ماهو لمن يطلبه شيٍ متاح
شيٍ مايوخذ بالسيوف وبالرماح وبالقنا
الشعر فن وموهبه ووراثه وفكر وكفاح
حسب الغزاره والخيال أما علا ولا دنا
شعرٍ يروح وصاحبه عايش مع ادراج الرّياح
وشعرٍ يخلّد ذكر من قاله ويبقى لو فنا