يسج الأقدام راع الإبل عند إبله

يا الله بصدق الخيال اللي من القبله
يسقي وطنا ويروي كل وديانه
وسم(ن) يسمي علينا ضافي(ن) وبله
يحيي غصون(ن) طواها الوقت عطشانه
ياخذ ثلاثين ليلة ما انقطع سبله
وتبطي تناسف وتطرق عذب غدرانه
والأرض تشبك من الحوذان والربله
وتلبس لباس(ن) ملون تبهر ألوانه
والضلع يخضر والوادي مع العبله
والطير يصدح ويعزف بجمل ألحانه
في منظر(ن) ما حصل مثله ولا قبله
هذا هوى نفسي اللي فيه ولهانه
وتزين نفس(ن) من المجلاس من دبله
على الطبيعة ونبت العشب شفقانه
ويسج الأقدام راع الإبل عند إبله
وينساك بيت السمنت وحبس حيطانه
جو المدينة تقول يطق به طبله
صجه ولجه ومنها العين عمسانه
والبر جوه مزاجه راهي(ن) حبله
ينعش قلوب(ن) من الإرهاق تعبانه
تركي بن مدعج