يا الله عسى نواً تنشا مسيان

يالله عسى نواً تنشا مسيان
يهل وبله من ثقال النصوبي
ويسقي الفياض الممحله طول الازمان
اللي كلاها الدهر من كل صوبي
والعشب يكسيها له اشكال والوان
عقب السحاب اللي عليها صبوبي
برض(ن) لها قلبي من الشوق ولهان
أحبها واعمر عليها دروبي
واسج فيها عن همومي والاحزان
وعن موقع(ن) كني عليه مغصوبي
واشب ضو الكيف في راس ما بان
واقند دلالي بكيف(ن) جنوبي
كيف(ن) يخلي عاكر الجو طربان
ويبعد عن القلب المعنى الكروبي
هذا هواي وكل نفس(ن) لها شان
والقلب من حب الخلا ما يتوبي
نواف محمد الصخابرة
تصوير الزميل محمد اليوسفي