كل البشر ترحل خليه يداها

يالله يا منزل من المزنه رشاش
يا مثبت(ن) أرضك ورافع سماها
يساتر(ن) من مكر الأنذال الاوباش
والخلق ترجع لك بعد منتهاها
حنا نوايانا كما خامت الشاش
وقلوبنا بيضاء نقي محتواها
فينا المبادي ثابته صعب تناش
من قدرنا نرفع قدر مستواها
نؤمن بأن العبد لو عاش ما عاش
ومشت له الدنيا على مابغاها
قدمه حساب مدقق يسلمه كاش
اما خسر ولا ربح من وراها
الظالمين فلول تنساق وتحاش
هم الحطب في نار يفجع لظاها
والصالحين اللي قضو عمر عطاش
الحوض في الجنه يبدد ظماها
ويالله عسى حصيلنا ما يجي ماش
يا منزل(ن) صورة تبارك وطاها
مهما نشوف ونسمع نرد بطناش
وأنظارنا حدقه بعيد(ن) مداها
واللاش مهما حاول مردده لاش
تقصر يدينه يوم يقبس وغاها
لابتسمت الدنيا ومع طيشها طاش
ما يحسب الغافل للوعة جفاها
والحر ذكره ينعش الكبد والجاش
دايم وربعه في حضوره تباها
والادمي لو حاش بيديه ما حاش
كل البشر ترحل خليه يداها
والتضحيه لا يمكن تروح ببلاش
عند الله الوالي لخلقه جزاها
تركي بن مدعج