الأرض لبست حلةٍ خضراء وكاسِ الجو غيم وزانت مكاشيت البراري والمولع جالها

صوت الصورة

عقب المطر يا زين جو البراري
يروق كيفك لوهمومك كثيرات
تكشت وتمشي بين حمرالخباري
اللي ملاه الرب نعمه وخيرات
عبدالكريم النغيمشي – الربيعية
منظر سعد ينصاه من كان فاضي
رايق مزاجه عزبته فوق جيبه
لا لاح برق الغيث من بعد ناضي
ينصاه ما حسَّب لبعد ومغيبه
يشوف خيره تمتليبه إفياضي
وهمّه يغيب بشوف مدرج شعيبه
فهد بن عقيل الطويان - بريدة
يا زين ذا الباطن عقب ما مشى السيل
منظر طبيعي مع رمالٍ نظيفه
واللي مجمّل منظره صفة نخيل
اللي مصور جاب لقطه ظريفه
سعود بن عبدالعزيز الهزاع - نعام
يا حي شوف المطر والسيل
عقب البطا تفيض وديانه
أسبوع كامل نهار وليل
وتربع الأرض عطشانه
عبدالله بن عبود السهلي - تبوك
من فضل ربي كل الأوطان سالت
والسيل شوفه يسعد القلب راحه
شوفوا جميع الناس داجت وجالت
في منظرٍ شوفه تقل شوف واحه
حمد عبدالله الوايلي - حوطة سدير
يا ظنتي إنك قليلٍ من العرف
إبعد شويه لا يشيلك شعيبه
السيل يحفر من تحت حافة الجرف
كم من غرق كم البشر مالقي به
عبودي الحامد
سالت أرض المملكة والخير عم
عم الجزيزة من ربٍ رحومي
كم سدٍ أمتلا يا كم .. يا كم
أمطار رحمه يا عساها تدومي
ماضي بن زيد القضاعي - الشعراء
الخير عم المملكة والفضل لله العظيم
أغاثنا وأحيا البلاد اللي شكت له حالها
أسقى الفياف المجدبه يوم أنهمل همال ديم
وأجرى السيول الجارفة من عاليات جبالها
الأرض لبست حلةٍ خضراء وكاسِ الجو غيم
وزانت مكاشيت البراري والمولع جالها
جميل بن محمد العنزي - الرياض
للسيل في مدرج مماشيه ميلاف
يشق وديانٍ قديمٍ مطرها
يخضر زرع ويجمع الناص وقّاف
ورغم الفرح درب الخطر ما غشاها
سالم معزي الفهيقي - تيماء
لا تقرب الوادي ومجرى مسيله
لا تصير بالطامن على وقت الامطار
الجرف متهايل وحدره مسيله
ما تنفع الهجه ليا صار ما صار
يا شفت بالمنشى بروق ومخيله
لا تطري المكشات ثم الزم الدار
عبدالعزيز العنزي - بريدة
أبعد عن الوديان في وقت الأمطار
السيل جارف كل شي بطريقه
حتى الحجر شاله من صغار وكبار
ما يحجزه شيٍ أبد ما يعيقه
خذ الحذر ياللي تصور بالأحذار
كم واحدٍ هالك وسطه غريقه
عواد بن مطرود الشمري - حائل
السيل نعمه والمطر يفرح الحال
والأرض قفرا والمراوح غنيمه
يالله طلبتك وأنت علام الأحوال
تنزل علينا الغيث وتحيي الهشيمه
يالله عسى الشعبان من الجال للجال
والخير يعم أوطاننا يا عليمه
خالد بن ناصر المخيمر - روضة سدير
السيل يحيي الهشيم الدمدم البالي
وينعش نفوسٍ لشوف الغيث ضميانه
يمناه لوحة خضارٍ والنخل عالي
ويسراه ناسٍ لشوفه جات شفقانه
سعود عائش الحربي
يا حيّ شوف السيل الله يحييه
نفرح ليا شفناه في بلادنا سيل
لكن عن الوديان أبعد شويه
لا يصير من بعد الفرح يكثر الويل
سلطان بن سعد السهلي
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
صورة العدد السابق