زمنّا سطر الفرحه على صدر الوطن بكتاب وعلّم من جهل فينا وش المحبوب لحبابه ترانا جسمنا واحد ولو يشكي جزء منصاب تلاقي جزءه الثاني شكا من كل ما صابه عقب ما الله حفظ بامره (أمير الأمن) شر غاب وشعب المملكة عيّد من الفرحة وغنّا به خطاك (السوء) يا محمد ولد نايف وفالك طاب عسى الله يحفظك باسمه من الإرهاب وأذنابه كفاك الله يا محمد من المجرم وسم الداب يموت المجرم بحقده وسمه باقي بنابه نواك المجرم بشرّه وبامر اللي خلقنا خاب ولا أفلح كل تخطيطه وراع الشر يبلابه نجاتك من فضل ربي حظت بين العرب باعجاب حماك اللي حمى بيته ونزل محكم كتابه ولا احد يأمن الغادر ولو خبّى الغدر بثياب عدوك ما تعرف اللي يخبّي من ورا ثيابه عسى الله يهدي الجاهل أو أنه ينسفه بشهاب إذا ما صار له داعي عسى الله يقلع ترابه جهل بالدين وأحكامه وعاث بها الحياة إرهاب متى المسلم غدا ارهابي يحنّ لعيشة الغابه؟! ولا قصرت يا محمد فتحت لمن تراجع باب وكل العالم بكبره سمع باللي سمعنا به وصرت بحكمتك (والد) لكل اللي رجع ثم تاب ولا عاقبت من قالوا (ولدنا ذا بحلنا به) وكل الناس تشهد لك بأنك من (ذوي الألباب) فعلت اللي عجز عنّه ولي من تاب واقرابه وجاك مقدر عفوك وحسّب يا الكريم حساب ولكن فيه من يغدر وعفوك له تذرّا به يجي لك تحسبه صادق وهو من داخله كذاب منافق يخفي احقاده (وداه) بداخل جرابه تمسكن يلبس الجاعد ولكنه حثال ذياب مخالف سنة الطاهر وخالف سنة اللابه غدا مع زمرته تابع وصار اذناب للاجناب تشوف افعالهم نسخه وكل البوم تتشابه غرض هالزمرة السوداء بتر في سيفنا الشذّاب يجز العرق من ساس يغذيها وتحيا به عشان نعلّم الخاين دروس بمبدأ الآداب ونكشف من يغذونه ونفضح من تسمى به بلادي يحفظك ربي من الاجناب والاغراب حماك الرب من عالم يصدّر ضدنا ارهابه
