فلاش

جاني بالمكتب شاب عمره ما تجاوز العشرين سنة.. وبعد.. قال.. ما أدري وش أقول.. بصراحة ما عمري دخلت مكافحة مخدرات أو أقسام شرطة.. والشي الثاني ما أدري أنا جاي اشتكي أبوي أو احل مشكلة أبوي اللي هو طايح فيها.. أحس اني ماني طبيعي أو ماني مركز قلتله.. يا خوي أنا عارف وش اللي في بالك.. لكن عطني ما عندك أكيد والدك مدمن، قال.. هذا الي أنا مستحي منه الحقيقة ان أبوي من كم سنة وهو مدمن خمر.. وبالعيد هذا كنت أنا والوالدة واخواتي مسافرين لبنان ويوم جينا بعد العيد إلا والبيت فاضي ما فيه لا أثاث ولا مطبخ ولا تلفزيون حتى بروايز الصور ما هي فيه أثره بايعهن على مروجين الخمر.. والحين ساكنين أنا وأهلي في شقة مفروشة وأبوي بالبيت لا هو اللي حي ولا ميت ولا أكل ولا غيره.. أبيكم تاخذونه للمستشفى عشان يتعالج ولا كذا يبي يدهورنا ويدهور نفسه.. قلت صحيح ديننا ما حرم شي إلا وفيه مضرة على الإنسان عشان كذا نقول للشباب احذروا هالخمر والمخدرات اللي ما وراها إلا الضياع والهلاك.. ويا لله سترك.
الأبرق