لها الله

تولم يا قلم والله لتتعب بأول المسرا
تجهّر جاتك أبيات من الخاطر وموزونه
تفنن وأكتب بمنهي تعلت بالسماء بدرا
تباها يوم ما غيرك كتب في حب مفتونه
قلم يانعنبوا خدك وجدك ناذر نذرا
لغني دام أنا أحبه ومعشوقه ومجنونه
بدأ ليلي يطول الليل ولاّ يطلع الفجرا
قسم بالله ما تسوى حياة خليف من دونه
وأنا الليله بغيباته دموعي جالها مجرا
وأنا أدري به مريض فراش ولا أقدر أصل عيونه
لها عندي منازل فوق لا تكتب ولا تقرا
لها عندي وصوف غير قليله قول مزيونه
لها رمش ليا أغضت به يتل ولا معه صبرا
لها خد كما البارق ولها حجان مقرونه
لها جيد ليا ردوفه ليل منتثر نثرا
لها قد ولها خطوه تثير العشب وفنونه
لها كف كما الديباج وعين ناعسه خدرا
لها لون قسم بالله ما لون مثل لونه
لها عند البني هيبه مثل هيبه ملك كسرا
ولها في خافقي مالا يقال ولو تلومنه
سلبني حبها قلبي وسحرني حسنها سحرا
وذبحني غيابها عني وزاد الخافق طعونه
وأنا أدري غيابها غصب ولها بغيابها عذرا
ولكن مع هذا عجزت عيوني تسعد بدونه
لها الله وأدعي الله يا عسى الله يسر العسرا
ويخفف كل حمل لو ثقل وأركى على متونه
ولي الله يا عسى يصبّر الصابر ليا بُكرا
واقابلها وعلمها غياب البارح أشلونه
ولو قالت ابي تكتب غلاي وحبي بشعرا
حرام أني لخلي الكون كله يسمع لحونه
خلف بن قعيد ضويحي