فلاش

أول ما دخلت المكتب ولاذاك الرجال لابس بشته وبعدما صبحت عليه بخير.. قال شف ابي حقين مكافحة المخدرات ياخذون ولدي يايسجنونه يا يعالجونه.. الولد هبل فيني وفي امه وبالبيت كله.. انا أدري انه مدمن على المخدرات واخوانه رجال.. حاولنا معه عشان يعقل ما قدرنا.. البارح جايب له شلة في البيت يسكرون وينكرون.. ويوم قمت الفجر ابروح للصلاة ولا هو منبطح لا هو حي ولا هو ميت.. وبالمجلس حاط اجهزة تلفزيون DVD ورسيفر ما لقيتها وأسأله عنها قال انسرقت.. انا متأكد انه بايعها على المروجين عشان جرعته وزقايره انا يابن الحلال لي اسمي ومعروف ولا ابي الصورة هذي تبان للناس.. والله لولا خوفي من الله اني لا اجدعه بالشارع ولا يدخل على البيت واتبرى منه الى يوم القيامة.
لا حول ولا قوة إلا بالله.. هذي حقيقة المخدرات ياناس. والهادي الله.. لكن اقول لكل ابو انه لازم يوضح لعياله وخصوصا وهم صغار ضرر المخدرات وخطرها عشان يكون في داخل كل ولد مناعة وحماية ضدها.. وياالله سترك.
الأبرق