فلاش

اتصلت أم واحد من المدمنين وقالت يا وليدي أنا كفيفة وكبيرة بالسن وعندي ولدي عمره فوق الثلاثين أزعجني وأزعج أبوه الشايب المريض الولد طاح بالمخدرات واللي طيحوه فيها ربعه الفاسدين وما خلاّ لاعندي ولا عند أبوه هللة وحدة.. ودائماً هواش وصراخ بالبيت إلين صار يهددنا وأنا خايفة لا يذبحنا وخايفة بعد على.. الشغالة، إخوانه الاثنين يدرسون بّرا، ولا عندي إلا بنية وحدة متزوجة ولا عاد صارت تجينا.. لا هي ولا زوجها كله من هالولد، اللي هبَّل فينا وبجيرانا.. ولا نعرف النوم وكل يوم حنا وياه في مشاكل.
الحاصل إن ولدها دخلوه المستشفى.. صارت الأم الكفيفة تطلب وتدعي الله إنه ما يطلع من المستشفى أبد.. لأنهم ارتاحوا من مشاكله وغثاه.
عمركم سمعتم أم تطلب إن ولدها يبقى سنة بالمستشفى.. لا.. وتقول ما ودي إنه يدخل البيت ولا أشوف وجهه تدرون ليش..؟ لأن المخدرات دمرت عقل هالولد وخلته مجنون وجاب المشاكل لبوه وأمه المساكين.. لأنهم ما كانوا يسمعون بشي اسمه (مخدرات).. ويا الله سترك.
الأبرق