فلاش

قبل ثلاثة أيام قرأت بإحدى الصحف عن اثنين من الشباب بينهما صداقة وعلاقة قوية تعاطيا الحشيش وقام واحد منهما وذبح خويه.. لا وزيادة على هذا قام وقطع رأسه.. هذي المخدرات وما تسوي.. وبالذات الحشيش لأن الحشيش له أضرار كبيرة أولاً لأنها تخلي الواحد إذا دخنها تجيه هلاوس سمعية وبصرية يعني يسمع أشياء ما لها وجود ويشوف أشياء ما هي موجودة أصلاً. وتجيب الشك وخصوصاً بين الزوج وزوجته والصديق وصديقه، وتخلي اللي يشربها مضطرب شخصياً ومريض وتدمر خلايا المخ إلين يجيه الجنون.. وهذا يا ناس ما هو كلامي.. هذا اللي نشوفه دايم للأسف.. وكلام الأطباء.. والمشكلة أن بعض الشباب اللي يتعاطاها يتوقع أنها ما تسبب إدمان.. والصحيح أن المادة هذي تخلي الواحد يدمن ولا يقدر بتركها.. ولا فيه أحد يذبح خويه أو يذبح أبوه أو.. فيه أبو يذبح ولده.. وهو صاحي.. ما فيه.. هذا يا إنه مدمن خمر.. أو مدمن مخدرات.. مافيه غيرهن.. يا شباب ترى هالمخدرات ما وراها إلا الدمار والفشل والسمعة الشينة.. وياالله سترك.
الأبرق