رأي العرب يعرض على عارفتها

لن عكر الصافي زمان التهاويل
وقامت همومك تشتغل طابعتها
ووقت العناء جاتك خيوله زرافيل
وحمولهن حدب الضلوع احتوتها
وبديت في منظومة الحط والشيل
والأرض ضاقت في عيونك سعتها
ازبن على من نزل الحق تنزيل
اللي رفع سبع وسبع تحتها
سبحان من بمره يوجه مكائيل
ويسوق سحب قدرته كونتها
ويهلك بها جيل ويرحم بها جيل
ويحط عبرت قوم في سابقتها
هو من يبدلها بيسر وتساهيل
وغيره محال انه يغير جهتها
دنيا زوال ولا وراها محاصيل
محد سلم منها ومن عنجهتها
ياما تعثر في شركها رياجيل
وياما عليهم كبرت دايرتها
وكم قللة من شان قوم حلاحيل
والعكس ياما رفعت منزلتها
ولا تكبر إلا في عيون المهابيل
ضعوف النفوس اللي ردي بختها
اللي على الدجه مقافي مقابيل
والناس في مادار ما عبرتها
والله ما يشف القلوب المغاليل
خطوت هلابيج عليك عرضتها
لو انها في منزل الجدي وسهيل
لابد يعطيك الزمن خارطتها
ويكشف لك الواقع بكل التفاصيل
وتعرف مساعيها وتفهم لغتها
واعطيك فيما اقول واف المعاديل
وراي العرب يعرض على عارفتها
محمد مذكر المغيبي العتيبي