البدو رحل.. والمسافه طويله شاهد من الصوره صحاري قديمه

البدو رحل.. والمسافه طويله
شاهد من الصوره صحاري قديمه
يوم الشدايد ترتكز في مسيله
وقلوب تنبض بالمحبة سليمه
وراعي الحلال يتبعه في محيله
متولع فيها مبادي عظيمه
حمد عبدالله الوايلي - حوطة سدير
صورةٍ تعني حياة البادية
قبل يظهر في الوطن نفطٍ وزيت
يوم ما توجد موارد ثانية
غير ما ينبت وما بيدك جنيت
والتنقّل في الصحاري الخالية
بالإبل ما به جيوب وْلا ونيت
ما قطعها غير شخصٍ داهية
لوّ ما هو داهية تلقاه ميت
محمد مقحم المقحم - الرياض
هذي حياة البدو وهذي رعاياهم
في وسط صحراهم شديدٍ ونِزَّال
أعشق مرابيهم واحب طرياهم
مهما الزمن والوقت بعهودهم طال
ما لنا ووجود بالارض لولاهم
اسلافنا وجذورنا عبر الاجيال
سعود عائش الحربي - جدة
يا مرحبا والقلب للبر طربان
يبي يوسع خاطره بالوناسه
لا جيت لك خايع من العشب مليان
الارض ممطوره والجو به نسناسه
والذود متفرق.. وللعشب ولهان
وبيت الشعر مبني مثبت اساسه
خالد بن ناصر المخيمر - روضة سدير
بيت الشعر شوف المضاهير تعجب
خلف النفود البر ابيوت وخيام
وإبلٍ تحن الصوت والصوت يطرب
وللجار حق وقدر وسلوم ووسام
صالح البشري
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد