هذي العطايا زين شوف الأصايل على جوانب شط بارك وطربان

يا راعي الناقه إلى جف ريقها
ليتك تفك القيد وانت في بر
عسرتها بالقيد واضح ضيقها
ليتك تدوجها على جال البحر
والا توديها يم الايفه تسيقها
البل عطاياالله تبي ريع وشجر
حمد عبدالله الوايلي - حوطة سدير
يا ناقتي حبي لك اللي دِفعني
أقَيدِك وبمي أرِشك عن الحر
يا ناقتي بكره الجو يِزيني
وتسيِّل الوديان والعشب الكثير
يا مِن يقول البل غلاها بعيني
إكرامها واجب سفينتك بالبر
هذي عطايا الله عبر السنيني
ولها بكل الحال موقف يِسر
سعود عايش الحربي - جدة
يا مرحبا والشوق للبل طربان
يسر عينك شوف زول المطيّه
مطيّةٍ وسط الخلا بين غدران
يالله عساها سالمه من لذيّه
خالد بن ناصر المخيمر - روضة سدير
هذي العطايا زين شوف الأصايل
على جوانب شط بارك وطربان
حتى ولو القيد ما هوب زايل
عزالله إن البل للصبر عنوان
نورة الفاضل - بريدة
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد