يا زين منظر هالنخل والرطب فيه مثل العروس اللي عليها ذهبها

صورةْ بموسمها، إشارة وإشعار،
باللي يجي للناس طلعة سهيلي.
موسم خراف التمْر في كل الاقطار،
اللي نخَلها من عداد الحصيلي.
والمِخرف معلّق، وما احلاه الى صار،
مليان من رزق الله بها النَّخيلي.
والكَرّ (1) موجودٍ وقاية م الاخطار،
ما ينفع الرجّال عزمٍ وحِيل.
يمكن يزلّ به القدم ثم الآثار،
ما تنحمد لو يبذل المستحيلي.
(1) الكرّ: حَبْلٌ مِنْ لِيفٍ يُصْعَدُ بِهِ إِلَى النَّخْلَةِ.
محمد مقحم المقحم - الرياض.
يا زين منظر هالنخل والرطب فيه
مثل العروس اللي عليها ذهبها
هي فرحة الفلاح يرقى ويجنيه
وهي مكسب الدلال واللي جلبها
يظهر عليه سهيل بايام ويسويه
واهل النخل يدرون واللي حسبها
سليمان بن عبدالعزيز السنيدي
مشكور راع النخل يوم اعتنابه
صار العذوق من الثمر مايلاتي
دعوة براهيم النبي مستجابه
يا رب ترزقهم من الثمراتي
النخل في وسط الحسا مثل غابه
ومن المدينه عجوة الضيف تاتي
والسّكري برض القصيم الحلا به
النخل رمز و سيدٍ للنباتي
محمد عبدالله الشهري - مكة المكرمة
النخله أم الخير فيها الرطب زان
وقُفَّت الفلاح مربُوطةٍ فيها
جِذع او جرايد والرطب سَر الاعيان
جعل وبل المزن بالدوم يِسقِيها
والنخله اللي دوم للخير عنوان
نَجنِي ثمرها ونستظل اِبْفِيافيها
سعود عائش الحربي
قرب سهيل وبين التمر باللون
وعين المزارع في محصوله مسروره
بدا الخراف وكل فلاح ممنون
قرب كراتينه والزبلان مزبوره
وصوت لها الدلال وين اللي يشرون
انواع التمور اللي بالمملكه مشهوره
يالله تجيب الغيث والفلاليح يسقون
نمسي ونصبح والبلادين ممطوره
خالد بن ناصر المخيمر. روضة سدير
موسم خراف والتمر بان فيها
طلع لها الصرام يخرف عذوقه
وفي مخرف توه يجمع عليها
مع اول الصبح لاشع بشروقه
النخل وقته والجني حان منها
ويالله تبارك بخير عندنا سوقه
هذي بلادي ثمرها في مجانيها
دار لها عز والمجد طايل فوقه
حمد عبدالله الوايلي - حوطة سدير
نرحب بمشاركاتكم الشِّعرية،
وما تلتقطه عدساتكم
من الصور الهادفة والطريفة
على إيميل الخزامى:
rb-khozama@alriyadh.com
صورة العدد