صوت الصورة

صورة العدد
إما ضحك والا بكى جور الأيام
طفلٍ صغير ما يعرف المراعي
على العمل حدوه واظنه إلزام
ما ينطح المرعى ضعيف المساعي
ترى الصغير ضعيف في حكم الايتام
ما احد فطن له لو ظمي والا جاعي
بعض البشر يمشي على نهج الاوهام
يفرح إلى كثر الغثاء والنزاعي
علي رشيد الرشيد - رياض الخبراء
يا صغير الصوره تراها جميله
فيها من الشكل الطبيعي ظريفه
يومك تجود في عصاك الطويله
راعي غنم حطيتهالك وظيفه
اضحك ولك ضحكه طريفه اصيله
لا واهنيك عايش وسط ريفه
والأرض خضراء سايله من مسيله
نبته من أشكال العشوب النظيفه
حمد عبدالله الوايلي - حوطة سدير
ترى السعادة ما تجي بكثرة المال
من طاع ربه فالسعد في مماشيه
واليوم شوفوا الطفل مسرور يا رجال
عايش حياته في سعادة نهنيه
وناسٍ ورى الدينار حلٍّ وترحال
ما يدري إن الموت لحظة وياتيه
والناس بالدنيا ترى إقفاي وإقبال
لا واهني اللي على الخير ماشين
محمد عبدالعزيز الخنيفر - أشيقر
أضحك وأسلّي خاطي وين ما روح
أرعى الغنم فالعشب وأحمل العصاتي
لجل الرعي ما بين ضحكات ومزوح
توي صغير السن ابغى كفاتي
وغيري بها التعليم جمعٍ مع طروح
يمكن على بكرة تزين الحياتي
جمال صالح الحنيني - القصيم
يالراعي اللي بالضحك ترفع الصوت
والوضع آمن .. والغنم مفلياتي
من شاف شكلك صار بالحيل مبهوت
يشفق عليك وخايف المقبلاتي
ترى المراجل بالصغر نقش منحوت
أفهم وصاتي .. لا تضيع الوصاتي
خالد ناصر المخيمر - روضة سدير
أشوف طفلٍ يبتسم مع حلاله
والابتسامة واضحة في محيّاه
هذا الطفل معروف بطيب السلاله
وسعادته ما هي خفيّه وشفناه
هذا الطفل بالطيب ما به مثاله
هذي سلوم رجال من طيب مجناه
يا طفل فعلك ما خفى بالاصاله
أنا أشهد إن الشهم هذي مزاياه
ريان محمد الخنيفر
هلا بالراعي اللي ضاحكٍ طربان
وتغميضة عيونه سر ضحكاته
تهيّض به غرام العاشق الولهان
إلا منه سرح يرعى غنيماته
إلا منه تجود في العصا تعبان
يترجم طيب قلبه بابتساماته
هيفاء بنت طلال التميمي - سدير
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق