خلك كبير بعين نفسك

حاول تحب انسان ثاني ينسيك
لاراح عنك اللي تحبه وخلاك
استمتع بغيره عسى الله يهنيك
تهرب من التفكير والضيق ينساك
لا يمنعك من حاضرك حب ماضيك
اذا صغرت، الهم يكبر ويقواك
تعيش بعقلك مع الوضع.. يعطيك
ضيّق على الضيق بذكاءك ويجفاك
ان ما تحديت انطوائك؛ بيطويك
يروح وقتك وانت في طور بلواك
في كل ليلة درب غمك يسريك
وتكدس همومك على رف رجواك
من الضعافة تعشق انسان جافيك
مشغول مع غيرك ولا همه رضاك
اللي يحبك صعب والله يخليك
ما يقبل بغيرك ولا يطيق فرقاك
لا تنشغل في شخص ما ينشغل فيك
تجيك رجلين المذلة وتاطاك
ان مالقيت احد يعزك ويغليك
تشبّث بحب اعتبارك ومبداك
خلك كبير بعين نفسك وتكفيك
عزيز في ذاتك، لو الكل خلاك