ياالله انك على قبره تهل الغمامي والله انه بدر والبدر يا زين نوره

كتبه معد زاوية بيت وصدى عادي الشمري برحيل مهندس الكلمة وتأبيناً للمرحوم بإذن الله الأمير بدر بن عبدالمحسن غفر الله له وجعل مثواه الجنة
والبيت يقول:
كل بدر يغيب ويقتفيه الظلامي
ويوم بدر ابوخالد غاب ماغاب نوره
وكان الصدى لفراق البدر من الشعراء:
رحمة الله على اللي راحلٍ باحترامي
والله انه من ال سعود واخوان نوره
هندس الحرف طول العمر بقصى اهتمامي
كان شخصيةٍ مرموق قايم بدوره
ياالله انك على قبره تهل الغمامي
والله انه بدر والبدر يا زين نوره
محمد عبدالله الشهري - جبل اثرب
تاجده في القصيد اللي كتب واستقامي
عن مفاخر بلدنا عبّر، ولعب دوره
عنده ان الشعر دفْع الوطن للأمامي
والوطن فرح به شاعر، وأيّد ظهوره
ما يجي يوم ما نسمع جميل الكلامي
عبر الاعلام نشره من دواعي سروره
جنّةٍ في اللقا يقال ادخلوها بسلامي
نسأل الله لبدر، ويرحم الله حضوره
محمد مقحم المقحم - الرياض.
الأمير أبو خالد خلد زين الكلامي
جعل مثواه جنّة خلد وفيها سروره
عاش بدر الامير ولبسوه الوسامي
باسم بدر الدجا طلة بدر مع ظهوره
صَخّر بفكرته للشعر كل اهتمامي
في قديِم وحداثه شعره اصبح اسطوره
يقتدي به شعار مثل سير النظامي
سيرة البدر وافكاره مَهيب مهجوره
مشعل بن صنت العصيمي - الخرج
افْتقدنا لنا قَامَة وعال المقامي
بالأدب والشعر في اوفى معاني سطوره
غيبتك يا بدر طَعْناتٍ والله جِسامي
أفَلْ البدر من يقدر يغطي لدُوره
والقوافي تودع بدر ليل التمامي
تارِكٍ بصْمة باسمه تصير محصوره
جعل مثواه جنه عند منْشِ الغمامي
والعفو العفو مِن كل نفسٍ صبوره
سعود عائش الحربي - جدة
بيت الأسبوع
كتبه للصفحة الشاعر عبدالله الفهري من الخبر ويقول:
والله ماتلقى مثل طبخة البيت
قدام عينك والنظافه أكيده
نستقبل صدى هذا البيت خلال أربعة أيام
من نشر البيت على إيميل الصفحة:
rb-khozama@alriyadh.com