امكيّفِ الماء شاهدٍ عصْر الَاجْواد اللي مساكنْهمْ من اللبْنِ وِالطّين

يا بيت ومكيِّفك بالجدر صحراوي
بوقتٍ مضى أديت دورك وواجبك
هذا المكيف كان وقته رهاوي
رغم المدى ما طاح كنه يجاوبك
وأهله كبارٍ بالعزم .. والهقاوي
وسيراتهم عبر التواريخ تطربك
صورة تمعن ما بها إن صرت هاوي
تغنيك عن بحثك باوراق تتعبك
وبديارنا هاليوم كلٍ غناوي
عراقة الماضي وتطوير يعجبك
سعود عائش الحربي - جدة
امكيّفِ الماء شاهدٍ عصْر الَاجْواد
اللي مساكنْهمْ من اللبْنِ وِالطّين
ليت الزمن لو راح يرجع وينعاد
ويرجع لنا جيلٍ عمى عينه الشين
لو هلّتِ العبرات يا شوق ما فاد
على خُطى الماضين اِلْكلِّ ماضين
لا شك شعّ العلم والخير قد زاد
لكنْ قلُوب أهل الصفا يا عربْ وين
قلّ التّواصل والرّبِعْ صارَوِا بْعاد
النّاسِ بالدّنيَا عنِ الناسِ لاهين
ناصر جمعان آل عوض - وادي الدواسر
قفّا الزمان اللي معه ضيقة الحال
وتبدلت أحوالنا بالسعاده
أجدادنا عاشوا على قلّة المال
تحملوا ضيم الزمان وعناده
كنديشن مصدي على وقت معكال
كيف المصوّر يا هل العرف صاده
جانا بداله مركزي ريّح البال
والصيف كله نهتني في براده
خالد ناصر المخيمر - روضة سدير
أقبل علينا الصيف يالله تعينا
ولا ينفع التكييف ولا هو يفيدي
واللي علينا الصبر وقتٍ يجينا
وكلٍ عليه السير بدربٍ يريده
ثم نضرب دروبٍ شمال ويمينا
ونبدا حياةٍ بالسياحه سعيده
محمد عبدالعزيز الخنيفر - أشيقر
البيت طين والمكيف قديمي
ولّت أيامه يوم وقت العسيره
حاله كسيفه والله اللي عليمي
ناس خذوفي عسر الأيام سيره
واليوم عشنا في نعيم مديمي
يالله تديمه والسنين الزهيره
حمد عبدالله الوايلي - حوطة سدير
جواً تغير ابتدت شدّة الصيف
في كل عام دايمٍ سايرينه
ولا ينفعك يا صاحبي اليوم تكييف
ترى السياحه مطلبٍ عارفينه
وبلادنا فيها كثير المصاييف
بأنحاء وطنا ما خفت فاهمينه
ريان محمد الخنيفر
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق