ترى الحنان اللي من الطير مجبول يحمي صغاره عن صواديف الأيام

طير الحبارى للصقاقير منشود
والصقر لا حوّل يسيّل دماها
من شيخكوا يالطير كم صار مصيود
ينوشها في البر .. ولاّ بسماها
وكل صيادٍ مشاها مع النود
يعرف مخادعها ويعرف حماها
محمد عبدالله الشهري- رجال ألمع
الطير في حزم ولاعنده الزول
ارضٍ براح ومابها كود هالطير
ماهمّه الدايج او باله الظول
همّه على بيضه وينظر السير
يالله تفكه لابدا يمّه الهول
اللي تصيد ولابدا رايهم غير
حمد عبدالله الوايلي - حوطة سدير
ترى الحنان اللي من الطير مجبول
يحمي صغاره عن صواديف الأيام
يرفع جناحه .. والغلا منه مبذول
سبحان من سخر لهن عرف الا فهام
رحمه من الله تشمل العرض والطول
حرز على المخلوق ان قام او نام
علي الرشيد - رياض الخبراء
مهما خدعت بصورة الطير لو بان
ذي صورته من خلف ماهي خفيّه
أبدع مصوّرها إبداع .. واتقان
ومنّي لابن هذال ألف التحيّه
صوره تقل رجال بالجو بردان
ذي خدعةٍ يا صعب تمشي عليّه
محمد عبدالعزيز الخنيفر - أشيقر
الفرخ راجن وحافظ له مساكين
عن اللواهب محتمين في جناحه
بين الحفاد اللي يشابه سكاكين
وبين القناصه اللي تدور مطاحه
من شاف شكله قال ياحي ذالعين
الله يفكه من الصياد .. وسلاحه
رحمه كتبها اللي خلقنا من الطين
ننعم بها ما بين المساء والصباحه
خالد ناصر المخيمر - روضة سدير
طيرٍ حمى فرخيه في دافي الريش
برضٍ فضا يحفَّها جملة اخطار
عشانهم متناسي الخوف والعيش
غريزةٍ بالأم من وَالْ الاقدار
ومقعدك مكشوفٍ بدرب الطراريش
ولجارحات الجو أهداف وخيار
ياطير هي ظروفك او هو عمل طيش
تحت السمايم واعلم الليل غدَّار
سعود عائش الحربي - جدة
الله يجيب السيل وتسعد به العين
الخير مقبل صبرك اليوم يا طير
بإذن الولي يا ربنا اليوم راجين
تجعل اراضينا على دوم في خير
ريان محمد الخنيفر
صورة العدد ‫‬
نرحب بمشاركاتكم الشعرية وما تلتقطه عدساتكم من الصور
الهادفة والطريفة على إيميل الخزامى:
rb-khozama@alriyadh.com