صوت الصورة

مكيف الشباك فكرة عجيبه
ركّب على موتر يبي له برادي
الحرّ جاب أفكار ياهي غريبه
أفكار فعلاً يا جماعة جدادي
حرًّ شديدٍ.. محرقاتٍ.. لهيبه
معذور لو ركب ورب العبادي
عثمان إبراهيم الرشيد - الرياض
مكيفٍ ركّب بشكلٍ بدائي
انصحك من موترك يا رجل فكه
ولا تسلّكه في سلك كهرب ومائي
والجمس له تصميم مافيه شكه
ما منٍ تكيف وليتٍ مسائي
يفصل فيوزه لو حصل فيه حكه
أحمد السمحان - الزلفي
الجو يطبخ والعراوي قديمه
موديلها واحد قبل عام سبعين
قبل البشر ترقى وفقر وعديمه
يوم انهم جوعى ومرضى وحافين
والا المكينه والبواجي سليمه
تطمر حدود الهند والسند والصين
عبدالكريم النغيمشي - لوذة
السايق كسر الطبلون
من زود الحرّ فالكنة
لاعب لعبه بالفريون
والموتر غادٍ له حنه
كنديشن مع دركسون
ماتركب يامال الجنه
عبدالعزيز فهد الريس - الرياض
أنا أشهد إن الفعل هذا خساره
ووضع المكيف يجعل الكل حيران
بالله قل لي وش بقى فالغماره
فكرة عقيمة وأنت بالحيل غلطان
سيارتك يا صاح ما هي عماره
من رأيي إنك تكمله بوضع الأفران
محمد عبدالعزيز الخنيفر - أشيقر
ثقل المكيف والحجم وقل الافكار
ما راح يبرّد مكيفك لو تطيري
اشتر مكيف مخصص لمصنع الكار
كنك بشبط البرد لي جا يسيري
ما لاختراعك يا رجل اي معيار
لو كان يصلح كان حطه خبيري
سعود عبدالعزيز الهزاع - نعام
اللي على الطبلون ركّب مكيف
وأسبابه زود الحرّ يا ناس حاديه
وجسمه بدين ما هو شخصٍ نحيف
ومكيف الموتر ما ظنه مكيفه
جوّه مثل منهو بلندن مصيف
لو كانت الصورة بها نوع تشويه
محمد إبراهيم الفيهد - الزلفي
الحرّ كايد يا هل العرف بالحيل
وراعي السيارة ما يبي من يلومه
حط المكيف وغنّى يا عين يا ليل
مشى بوسط القايله وزانت علومه
عنده موتره أحسن من آخر موديل
ما يفرط فيه لو كثر السوام سومه
خالد ناصر المخيمر - روضة سدير
لاصرت وسط الجمس والحرّ حاديك
أي المكيف وأي سم اللواهيب
برد المكيف والهواء اليوم يكفيك
احذر حريقً بعد فكٍ وتركيب
عقب التعب عقب الجهد وش يسليك
كم فكرةٍ تنجح ونوب ترى تخيب
عبدالمحسن محمد المحيسن - رياض الخبراء
الموتراللي قديم وصك بيبانه
والحر وقعه شديدوركزاطنابه
راعيه ركب مكيف كنه الدانه
مكيف البيت فاعل كل اسبابه
مشبك السلك يبردحول ميدانه
توليفة كلهاقامت على حسابه
حمد عبدالله الوايلي - حوطة سدير
المكيف كبير وموقعه ما يصير
حطه ببيتك أفضل خذها مني نصيحه
شف مكان مناسب وخل عقلك كبير
ذي رسالة وخذها قلتها لك صريحه
ذي سواتك مثيرة والفعل ذا خطير
وذي فعول فعلته قلت ما هي صحيحه
ريان محمد الخنيفر
صورة العدد السابق
نرحب بمشاركاتكم الشعرية وما تلتقطه
عدساتكم من الصور الهادفة والطريفة ..
على إيميل الخزامى:
rb-khozama@alriyadh.com
أو الفاكس رقم: 0114871070