أحلام ماضينا

عن مصير احلام ماضينا الجميل
لا تسولف هالسوالف خلها
غير الموضوع لك شكري جزيل
لا تعيد احداث قلبي ملها
جيت اوسع خاطري عندك قليل
سل نفسي لو دقايق سلها
قال كنت اذكرك لاحلامك تميل
ولك طموحاتٍ تبي توصل لها
قلت صح وعارف ان عندك دليل
لكن ابطا الوضع ليت وعلها
لين جانا وقت ما خلا حصيل
بعثر احلامي علي واستلها
والعمر شمسه توارت للرحيل
ضاق وقتي للمسايل كلها
قال انت اشعلت في جوفي فتيل
حتى انا احلامي زماني تلها
ووالله اني احسب ان مثلي قليل
اثر خلق الله تشابه جلها
قلت انسى شي أصبح مستحيل
عيش يومك ثم صلاتك صلها
والذي مكتوب تلقى له سبيل
وغير ذاك اوهام لو تعمل لها
عايض الميلبي