العطر

فمان الله
ألا واشيب عيني يوم قالوا لي فمان الله
وتحققت انهم من عقب جمعاهم مقفيني
تغايا لي خيال الموت يومه مد لي يمناه
ولد بعينه الخرسى عقب ماقفى يراعيني
نهت وقلت مما جال بالصندوق واعزاه
سراب اللال باكر يطرد ما بينه وبيني
شَعر الأمير - عبدالله الفيصل
الجرح
نويت مرباع الغضي سيد الأحباب
قصدي يزول الجرح زاد التهابه
جيت وبقايا نارهم حول الأطناب
بيت الشَّعر مطوي وباقي زهابه
أقفت ركايبهم ومنّي الهدب ذاب
من دمعي يسأل وأنذهل بالإجابه
شِعر - سعد الخريجي
مشاعرنا
تعالي نسكت أحسن من كلامٍ تاليته جروح
هلا بالصمت دام الصمت ما يجرح مشاعرنا
أنا وأنتي وطول الصمت والدمعة وكثر البوح
وليلٍ ما بقى به حيل ينهانا ويامرنا
بكى ما كنّه اللي كان يغرينا فرح ومزوح
سكت ما كنّه اللي كان ملهمنا وشاعرنا
شِعر - رشيد الدهام
العطر
بجانب كحلك ومشطك وبعض اشيا منثوره
وعطر غامض مثلك يخبي في الزجاج اسرار
أنا عشت الهوى قربك مجرد صوره مكسوره
على تسريحتك عاشت جبيسة كذبة وغبار
أشوفك تنظرين لها بضحكه عين مسروره
وأفكر نظرتك شوق ومعاها جمليتين اعذار
شِعر - علي الخوار
الأمير - عبدالله الفيصل
سعد الخريجي
علي الخوار
رشيد الدهام
Your browser does not support the video tag.