الليله الملهمه

عن شارد المفرده ماذقت حلو الكرا
والليله الملهمه ماخابت أظنونها
أحب ريح المطر وأخيل برقٍ سرا
وأجيب ماجابت الورقا من ألحونها
يلومني فالمحبه واحدٍ مادرا
ماشاف ذيك الرموش السود وأعيونها
والقذله اللي عن الحجان تنسف ورا
وأن دنّقت بالنظر. مالت على هونها
لاقلت قلبي دله والجرح الأول برا
صادفت من تبتسم والموت من دونها
وذكرت دنيا الغرام وكل شيٍ طرا
تغيّر الوقت وأشواقي على لونها
يامايس القد مالي عن سهومك ذرا
تاقع على مهجتي وتجدّد أطعونها
سلّمتك الامر كله وأفعل اللي ترا
تروي ضما الكبد ولاّ تجرح أغصونها
واهل الهوى لانظرت اللي عليهم جرا
قنعت بأن المحبه ذاه قانونها
وأقول للي كتب وأقول للي قرا
يارحمة الله على ليلى ومجنونها
Your browser does not support the video tag.