مساجين المشاعر

أشوف الموت بعيونك ورمشك لاغشاه نعاس
يهدّدني خطر موجك ولا أدري وين يرميني
أسرت القلب في نظره بلا جند وبلا حرّاس
تطوّقني بنظراتن تحرّك كل مافيني
مساجين المشاعر لك تداحم من ورى الأقواس
عيونك فكّت القضبان واعفت عن مساجيني
يسابق لهفتي حرفي يترجم خافي الإحساس
على صدر الورق لجلك نظمت العقد بيديني
خذت منّك بعض شيّ وتلالت كنّها الألماس
تشدّ أنظار من يقرا وتوثّق بالدواويني
فريد أبخلقك وخلقك مميّز بين كل الناس
جمالك يبهر وأسمك يزلزل للسلاطيني
يمهره مهرها غالي من أخيولن عريبة ساس
أصيلة تلفت الانظار في وسط المياديني
رصيدك بالغلا يكبر ولا يشكي من الإفلاس
على مر الزمن يبقى ويجري في شراييني
لك الله ماعشق قلبي بشر غيرك من الأجناس
زهيت ابعيني ولاحدن مثل وصفك ملا عيني
عوض سلامه العنزي
Your browser does not support the video tag.