جموح المشاعر

واصدّ عن مغريات النفس بالعاني
اشوف شيٍ مثل ورد البساتيني
اللي تحصّل بها من كل الالواني
واكبح جموح المشاعر لاعبث فيني
كن المشاعر فرس واخلاقي عناني
كم لي عن العشق هاجدةٍ شياطيني
وقفّلت عن مايثير النفس بيباني
ولو يتبع القلب ماتطرب له العيني
كان انتهابي طريق العمر مامداني
والعمر يمضي وغنّت لي ثلاثيني
راحت تداحم سنينه واخره فاني
خليت دربٍ مشيته بينك وبيني
ياحادي العيس جاني منْك ماكفاني
أنا خويك على العادات والديني
لاحتجت شفني على يمناك تلقاني
والشعر هذا على الفطره مخاويني
من ذقت طعم الحياه وسبّح لساني
احس فيه الملاذ اللي يدفيني
عن برد جرد السنين اليا تبلاني
اشقيه لاحتجت له واحيان يشقيني
الين يروي قراحه كل ضمياني
حتى حسدوني عليه أكثر محبيني
وأنا اللي اعدهم من حسبة اخواني
كم واحدٍ يبتسم لي واثره بطيني
وانا على نيتي وسلوم جداني
اعامل الناس بالمعروف والليني
وحب فعل الجماله كثر عدواني
اللي تفضّو لشذبي بالدواويني
وشفني تعديتهم واحد ورى الثاني
الشاعر: نهار بن ممدوح