اتركونا دون توديع والمكسب دموع

ارجهن ياقلب وش عاد خلانك مشو
سافرو لاعاد ترجي من المقفي رجوع
ركبو الصالون عجلين والدنيا صحو
اتركونا دون توديع والمكسب دموع
الموادع بس نظرات من عين الحلو
يوم شعره غازل الشمس واختار السطوع
قمت اراعيهم وأنا أقول ياقلبي غدو
كسروا عوج المهاديف بالسيف القطوع
طفلةٍ في مشيته طيش وأخلاق وزهو
سهم عينه هد قلبي وأنا لابس دروع
ليتهم من قبل يمشون للعاشق حكو
كلمةٍ يرضابها قلب دام إني قنوع
ليه ياللي فيك الازهار غنولك شدو
اسمع اسمك بالحدايق يردونه جموع
ليتهم قبل المشاوير في حائل لهو
وجنبوني فقد محبوب واحساسٍ يروع
ليتهم للبعد والهجر ماكانو سعو
ما احترق قلبي من البعد ما ماتت زروع
والله انك يادوى القلب بافعالك عدو
ليش ماقدرت الاخطار من قبل الوقوع
ليت مثل اللي عطيناه ياقلبي عطو
حطموني حسبي الله والفرقا تلوع
بس ياقلبي من اليوم خلانك غدو
لاتدور شي مفقود وتحلم بالرجوع