رجلٍ يحب الخير والطير ناصيه

الطير يألف من يقدّم له الخير
وان كان ما يلقى حفاوة عنه طار
هذا الحمام يحوم حوله ولا يطير
ياقع على اكتافه كأنه بالأوكار
مأجور في فعله ولا فيه تقصير
من يبذل المعروف يذكر بالأخبار
علي الرشيد - رياض الخبراء
الحال لاتنشد عن الحال والفال
يكفيك شوفة صورتي بالجريده
شايب ولالي رغبةٍ زود من مال
وأعيش في أرضي حياتي سعيده
أدوّر المعروف .. والخير لازال
وأطعم طيورٍ في عددها عديده
حمام ياللي في الميادين تختال
ما ذيروه أهل الحسد.. والنكيده
حمد عبدالله الوايلي - حوطة سدير
ماجور ياللي عطيت العيش
كل الحمايم خذيت أجره
شكلك رهيبٍ غطاك الريش
الجوع جابه .. وهي تكره
ياخوي تصلح تقود الجيش
وصدرك نياشين منسطره
نعطيك راتب لو إنه إيش
ونعطيك طن من الفطره
عبدالكريم النغيمشي - لوذة
لك وقفتٍ بالخير يا مسعف الطير
أجر وثواب ويا هني من سقاها
طيرٍ وغيره لا تهم المخاسير
الله من الخيرات بفعله جناها
مجزيٍ بالخيرات يا فاعل الخير
هذي مواعظ يا هني من مشاها
أحفظ سلومٍ طيّبة فيه تقدير
شوف البهيمة فايزٍ من رعاها
محمد عبدالعزيز الخنيفر - أشيقر
أفضل عمل إحسان تطعم لك طيور
مثل الشنب اللي كساه الحمامي
به عاطفه للطير رقيطي وعصفور
أكبر دليل موالفينه دوامي
العيش من كيسه على الأرض منثور
يا الله عسى يمناه بخير وسلامي
وليا سقيت الطير فالفعل مأجور
أجرٍ كبير لارتوت كبد ضامي
سعود عبدالعزيز الهزاع - نعام
حنا بشهرٍ كله اجر .. وحسنات
والطير من يرعاه يلقى المثوبه
حمام فوق الكتف مظهر حضارات
رحمه وعطفٍ بين الأرواح مطلوبه
حمام ما أحلى منك عذبات الأصوات
رمز السلام اللي مع الكل مكتوبه
سعود عائش الحربي - جدة
رجلٍ يحب الخير والطير ناصيه
لقا طعامه حب ويفضله زين
والطير حوله يا عرب بس مغليه
ملتف حوله زين يا ناس ذالحين
وكيس الطعام مقرّبه عند رجليه
يبيه يأكل دوم ما قال بعدين
وإليا شبع وقّع على راس راعيه
وطيرٍ هديله واصل الرأس والعين
خليف فهيد الحربي - الرياض
هل الهلال وفرحة الناس بالصوم
يا الله عسى الرحمه تعم العديدين
وطير الحمام اللي تعوّد على الحوم
بين السماء والأرض يرف جناحين
متناثرٍ فوق الخواجات بالكوم
مرتاح من جور القناصه عديدين
عند الخواجه رفرف الطير معزوم
ويحوم في الشارع .. يحوم الميادين
خالد ناصر المخيمر - روضة سدير
الطير يطلب ماء حذرى تغفلون
حطوا لها سطلٍ وتلقى ثوابه
الخير تلو الخير وانتم تعرفون
هذي رسالة والأمل في جوابه
حنا بعزّ الصيف والناس يلهون
واليوم شوفوا الجو بعزّ التهابه
هذي وصية وانتظر لو تجيبون
همّوا لها ياهل الوفاء والذرابه
ريان محمد الخنيفر
حمام طاير فوق رأسه كثيرين
متجمعٍ فوقه جمعات وأسراب
يبغى المعيشه جايلٍ في الميادين
وتمازجت فرحة بشوفة أحباب
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد