ريح النفل لا فاح مع ديمة الغيم

صور شاعرية

البر زان وجوكم جو تخييم
واحنا بجوٍ مشقي اللي مصاليه
بردٍ يحطم قاسي العظم تحطيم
وانتوا بجوٍ كل ما فيه نرجيه
شفت الفياض وشفت ذود المجاهيم
ترتع بعشبٍ جل من هو مسويه
ريح النفل لا فاح مع ديمة الغيم
يبري عمس قلبٍ شكى فقد غاليه
وضوٍ سناها فوق رؤوس المعازيم
نفسي لها تشتاق وتقول لبيه
لبيه يا دار بها أموت وأهيم
دار الوفا والطيب ما نيب ناسيه
وجدي عليها وجد من تاه ويهيم
في قفرةٍ والمزودة ما تكفيه
وشاف السراب وكب ما حاز ليديم
ويومٍ لفاه يوم ما عاد يغنيه
تهناكم الكشتات والروض والديم
وعسى نجيها والمراويح تسقيه