صوت الصورة

هذي صفوف جعلها دايم تزود
والطفل قدم الصف يحتاج توجيه
لا واهني اللي بذل كل مجهود
في طاعة الله والسعد في مماشيه
تكفون يا أهل الطيب والعرف والجود
لازم نحث الابن حذرى نخلّيه
محمد عبدالعزيز الخنيفر - أشيقر
طفل صغيرٍ يرقب اللي يصلون
قدام صفٍ كلبوهم مصلين
جابه أبوه ومقصده يعرف الكون
يشوف ناسٍ على ملّة الدين
الله يحرسه من بلا كل مجنون
ترى مكانه حاشدٍ بالملايين
حمد عبدالله الوايلي - حوطة سدير
وش عندكم يمي تميلون بالروس
توي صغير ومافهم اللي تسوون
يايوه فكيني ترى الطفل مديوس
قامت عليه جموع ربي يبصون
يا خواني ابقعد ولامشي ولا أحوس
بس اتركون الحين تكفون تكفون
عبدالكريم النغيمشي - لوذه
يا وليد وش جابك المسجد
قبل السبع ماعليك ركوع
ما غير تفتر.. وتنشّد
بابا وماما نزول طلوع
أبعد عن الصف خل نسجد
ولا تشغل الناس يا دلوع
عبدالعزيز فهد الريس - الرياض
الله يقبل طاعة اللي مصلين
اللي بصفٍ راكعين لجلالك
وتصلح صغيرٍ راح إيسار ويمين
وتبعد حرام عنه .. تدني حلالك
من صغرته ينشأ على العلم والدين
دامك صغيرٍ عش تهنّ بدلالك
عثمان إبراهيم الرشيد - الرياض
يا ولي الأمر فكر بالصغير
شجّعه للبيت يا ولد الحلال
هو صغير السن وفعله ما يصير
وجّهه للخير مع خفض الدلال
النصيحة واجبة وزين المسير
حطّه بيمناك وافهم بالعدال
ريان محمد الخنيفر - الرياض
يا طفل ياللي سهمتك تزعج الناس
ليتك بوسط البيت جالس ولاهي
بعض الاوادم ينقصه زود الإحساس
الأب لازم ينصح الطفل .. وناهي
بعض الصغار أفعالهم توجع الرأس
وأبوهم عنهم يا هل العرف ساهي
خالد ناصر المخيمر - روضة سدير
لي جاء الشهر خصٍ صلاة التراويح
وكلٍ يصلي يطلب الرب غفران
تلقى الطفل يلعب على الصف ويطيح
على اللي جنبه من رجالٍ ونسوان
أيضا وتلقى واحدٍ قبله يصيح
يبكي ولو عنده من الناس بزران
سعود عبدالعزيز الهزاع - نعام
طفلٍ صغيرٍ ينظر اللي يصلون
لاشك مفطورٍ على ملّة الدين
متعجبٍ متفكرٍ وش يسوون
نظرة تأمل تعجب اللي ورا الصين
وقفة براءة شافها اللي يمرون
يالله تفك الطفل من سهمة العين
عبدالمحسن المحيسن - رياض الخبراء
صورة العدد السابق
نرحب بمشاركاتكم الشعرية وما تلتقطه
عدساتكم من الصور الهادفة والطريفة..
على إيميل الخزامى:
rb-khozama@alriyadh.com
أو الفاكس رقم: 0114871070