اللغز

الأسبوع الماضي كان لغز الأسبوع من طرح الشاعر راضي علي المطرفي من الخرج والذي يقول:
أنشدك عن بنت على كتوف رجال
أمثبته تثبيت من دون ماتميل
من شان تنطح له عجوزاً عن الجال
وساعة منا طحهن تقوم الرجاجيل
وقد توصل للحل شعراً:
الحل خلف الباب مربوط بحبال
شبكة وكورة والرجال الحلاحيل
وقدامهم حارس على الباب يجتال
وعجوزكم فيها التعب والبهاذيل
محمد بن عبدالرحمن ابودحيم - القصيم
يامرحبا حييت يا طيّب الفال
ترحيبٍة تاصلك عبر المراسيل
هدّاف يالهدّاف سجل لي أقوال
شبكتها بالباب ياخوك تسجيل
صلاح بن عبدالله اليابس - رحيمة
أغلى تحية للمناعير الأبطال
أهل الخزامى لا ذكرنا الحلاحيل
اللغز حله نرسله عبر الإرسال
شبك القدم مع كورة دون تفصيل
علي رشيد الرشيد - رياض الخبراء
البنت يابينه على كل الأحوال
ماضرها شمسٍ ولا ضرها سيل
في ملعب الكورة تشوفه لها فال
ما تقبل العيله ولا تقبل الميل
ياسر بن محمد الدفاع - عنيزة
الحل أرسلته إلى بكر هذال
عساه ياصل قبل ما يمسي الليل
الباب بالملعب ومعروف الأطوال
فيه الشبك يا ربعنا دون تحليل
فالح غازي الحربي - القصيم
يامرحبا راضي هلا زين الأقوال
في صفحة اخزامى هل البنّ والهيل
البنت طربانه على قول الأبطال
وإن صارت الكوره سمعت المواويل
سالم حبيب البشري- الجبيل
اللغز حله ياجماعة على البال
ودي أجيبه دون شرح وتحليل
هذاك شفته بالملاعب ولازال
والكوره اللي صاحبتها المواويل
طلال فالح الحربي- القصيم
كما توصل للحل نثراً حمود سعيد القحطاني.
لغز الأسبوع
كتبه ل (الخزامى) الشاعر عبدالهادي بن ناصر آل غيث من هجرة الفياض حصاة قحطان ويقول:
ويش رجل عايش عيشه شقيه
في محل ظنك يا مقشر مكانه
من قشر حظه غدا مثل الحنيه
بين الأم.. وبين أبو شاف الإهانة
نستقبل الحلول على فاكس رقم 4871070 صفحة خزامى الصحاري زاوية لغز الأسبوع.. كما نرحب بطرح الألغاز الجيدة والجديدة وياهلا بالجميع.