اللغز

كان اللغز السابق من طرح الشاعر ياسر محمد الرفاع والذي يقول:
انشدك عن ورع تشوفه مع أمه
ولا تعرف أمه لين معها نشوفه
إذا خطت امه بالخطا ما يهمه
وإن كان صابت ثابت في وقوفه
وقد توصل للحل شعراً كل من:
أهلاً بياسر وارسل الحل يمه
عبر الخزامى ما علينا كلوفه
هذا شعار قايم بالمهمة
لاجل القناة اللي تولت وصوفه
علي رشيد الرشيد - رياض الخبراء
اللغز ذا بعض العرب مايهمه
وبعض العرب شافه ودايم يحوفه
شعار بالتلفاز شاشه تضمه
في زاوية يمنى ويسرى تشوفه
محمد بن عبدالرحمن أبو دحيم - القصيم
قال الذي يرمع مراميع قمه
ارسلت مرماعي بحروة وصوفه
أم بليا ورع من غير يمه
بشعارها تاضح كفا عن حروفه
سالم البشري - الجبيل
إلى بديت القول ودك تتمه
لأجل البيوت أموضحه ومعروفه
حله شعار والمحطة هي أمه
وكل ديره بينات وصوفه
فالح غازي الحربي - القصيم
لغز الأسبوع
كتبه ل«الخزامى» الشاعر راضي علي المطرفي من الخرج ويقول:
أنشدك عن بنتاً على كتوف رجال
أمثبته تثبيت من دون ما تميل
من شان تنطح عجوزاً عن الجال
وساعة مناطحهن تقوم الرجاجيل
نستقبل الحلول على الفاكس رقم 4871070 صفحة (خزامى الصحاري) زاوية (لغز الأسبوع).. كما نرحب بطرح الألغاز الجديدة.. ويا هلا بالجميع.